Звярнуліся ў спецыяльныя працэдуры ААН у сувязі з працягам рэпрэсій у дачыненні да незалежных прафсаюзаў

10.01.2023

Беларускі Хельсінкскі Камітэт звярнуўся да Спецыяльных дакладчыкаў па пытанні аб правах па свабоду мірных сходаў і асацыяцыі, па пытанні аб інфармацыі і па сітуацыі з правамі чалавека ў Беларусі з інфармацыяй рэпрэсіях з боку беларускіх уладаў у дачыненні да незалежных прафсаюзаў у парушэнне права на свабоду асацыяцый.

У паведамленні мы звярнулі ўвагу на тое, што на гэты час больш за 40 прафсаюзных актывістаў і лідэраў знаходзяцца ў зняволенні па палітычных матывах.

Мы распавялі пра справу Вольгі Брыцікавай, якая правяла 75 дзён у зняволенні па адміністрацыйных артыкулах вясной 2022 года, а ў лістападзе была зноў затрыманая і асуджаная; Аляксандра Мішука і Міхаіла Громава, асуджаных да 2,5 гадоў пазбаўлення волі; Яніны Малаш, асуджанай да 1,5 гадоў пазбаўлення волі; Андрэя Ханевіча, асуджанага на 5 гадоў зняволення.

У паведамленні таксама змяшчаецца інфармацыя аб справе Беларускага кангрэса дэмакратычных прафсаюзаў. У прыватнасці пра тоем, што старшыню прафсаюза Аляксандра Ярашука, яго намесніка Сяргея Антусевіча і бухгалтарку Ірыну Бут-Гусаім асудзілі на 4, 2 і 1,5 гады адпаведна.

Мы падкрэслілі, што Генадзь Фядыніч і Васіль Бераснёў, асуджаныя на 9 гадоў, і Вячаслаў Арэшка, асуджаны на 8 гадоў пазбаўлення волі, з'яўляюцца пенсіянерамі. Больш за тое, здароўе Васіля Бераснева ў папярэднім зняволенні значна пагоршылася. Ён пакутуе ад моцных боляў у адзінай нырцы. Другую выдалілі з прычыны анкалагічнага захворвання.

На нашу думку, вынесеныя прысуды з'яўляюцца палітычнай расправай і помстай за іх мірныя дзеянні па абароне беларускіх працоўных з выкарыстаннем нацыянальных і міжнародных інструментаў, за выказванне сваёй незалежнай пазіцыі ў адносінах да парушэнняў правоў працоўных у Беларусі пасля прэзідэнцкіх выбараў 2020 года.

На думку БХК, такія дзеянні беларускіх уладаў парушаюць артыкул 2 Канвенцыі МАП № 87, які прадугледжвае, што працаўнікі маюць права ствараць арганізацыі па свайму выбару без папярэдняга дазволу, і права ўступаць у такія арганізацыі, і артыкул 11, які прадугледжвае, што дзяржава абавязваецца прымаць усе неабходныя. і належныя меры, каб гарантаваць работнікам і працадаўцам свабоднае ажыццяўленне права на стварэнне прафсаюзаў. Больш за тое, такі зварот парушае права на свабоду асацыяцыі, у тым ліку права ствараць прафесійныя саюзы і ўступаць у іх, прадугледжанае артыкулам 22 Міжнароднага Пакта аб грамадзянскіх і палітчных правах.