Заява беларускіх праваабарончых арганізацый
12 жніўня 2020 года ад людзей, якія вызваліліся з Цэнтра ізаляцыі правапарушальнікаў ГУУС Менгарвыканкама (далей – ЦІП), нам стала вядома аб тым, што затрыманыя за ўдзел у мірных акцыях пратэсту 9, 10 і 11 жніўня 2020 года знаходзяцца ў бесчалавечных умовах, многія падвяргаюцца катаванням. Людзей збіваюць, трымаюць у перапоўненых камерах: па 40-50 чалавек у камеры, разлічанай толькі на 4-6 чалавек, з-за чаго немагчыма спаць ноччу, людзям не хапае паветра і прасторы. Таксама паведамляецца, што людзей не кормяць, а пры спробе прысесці днём пачынаюць збіваць. Вельмі шмат людзей з ЦІП вязуць машыны хуткай дапамогі. У Гомелі памёр падчас затрымання малады чалавек.
Маюцца шматлікія сведчанні жорсткасці, гвалту і беспадстаўнага прымянення фізічнай сілы і спецыяльных сродкаў да людзей, якія ўтрымліваюцца на тэрыторыі аддзяленняў міліцыі ў чаканні афармлення неабходных працэсуальных дакументаў.
Мы адзначаем, што дадзеныя дзеянні з'яўляюцца жорсткім абыходжаннем і катаваннямі, якія недапушчальныя і павінны быць спыненыя.
У адпаведнасці з часткай трэцяй артыкула 25 Канстытуцыі Рэспублікі Беларусь ніхто не павінен падвяргацца катаванням, жорсткаму, бесчалавечнаму або зневажальнаму яго годнасць абыходжанню.
У адпаведнасці з артыкулам 7 Міжнароднага пакта аб грамадзянскіх і палітычных правах ніхто не павінен падвяргацца катаванням або жорсткім, бесчалавечным або зневажальнаму яго годнасць абыходжанню або пакаранню.
Хочам нагадаць, што права на свабоду ад катаванняў і жорсткага абыходжання ў адпаведнасці з Канстытуцыяй і міжнароднымі абавязацельствамі Рэспублікі Беларусь з'яўляецца абсаюзным, і ў адрозненне ад іншых правоў чалавека, не падлягае ніякім абмежаванням, нават у ваенны час.
Мы, прадстаўнікі беларускіх праваабарончых арганізацый, заяўляем, што катаванні і жорсткае абыходжанне недапушчальныя, і таму патрабуем:
- Неадкладна спыніць любыя акты катаванняў і жорсткага абыходжання пры ўтрыманні людзей у РУУС, ІЧУ, ЦІП, а таксама пры перавозцы іх да месцаў прымусовага ўтрымання.
- Вызваліць усіх затрыманых у сувязі з немагчымасцю забяспечыць затрыманым гуманныя ўмовы ўтрымання, якія адпавядаюць міжнародным дагаворам і заканадаўствам Рэспублікі Беларусь.
- Расследаваць усе выпадкі прымянення жорсткага абыходжання і катаванняў у РУУС, ІЧУ, ЦІП і падчас перавозкі іх да месцаў прымусовага ўтрымання.
РГА "Прававая ініцыятыва»
Грамадскае аб'яднанне "Звяно»
Экспертна-прававое Таварыства ""Ініцыятыва FORB"
Ініцыятыўная група "Ідэнтычнасць і права”
Праваабарончая арганізацыя " Human Constanta»
РПГА "Беларускі Хельсінкскі Камітэт"
Публічная ўстанова "Беларускі дакументацыйны цэнтр"
Цэнтр прававой трансфармацыі Lawtrend
ГА " Беларуская асацыяцыя журналістаў”
Беларускі дом правоў чалавека імя Барыса Звозскава
Грамадзянская ініцыятыва "За справядлівы суд у Беларусі"
Праваабарончы цэнтр "Вясна"
Офіс па правах людзей з інваліднасцю
Тэкст заявы публікуе сайт legin.by
